சுரேஷ் சலே 28ஆம் திகதி வரை வைத்தியசாலையில்..
உயிர்த்த ஞாயிறு பயங்கரவாதத் தாக்குதலுக்கு உதவிகள், அனுசரணை வழங்கியமை மற்றும் சதித்திட்டம் தீட்டியமை ஆகிய குற்றச்சாட்டுகளின் பேரில் தடுப்புக்காவல் உத்தரவு வழங்கப்பட்டு தேசிய வைத்தியசாலையில் அனுமதிக்கப்பட்டுள்ள அரச புலனாய்வு பிரிவின் முன்னாள் பிரதானி சுரேஷ் சலே எதிர்வரும் 28ஆம் திகதி வரை சிகிச்சை பெற வேண்டும் என வைத்திய அதிகாரிகள் பரிந்துரைத்துள்ளனர். மருத்துவ அறிக்கைகளை சமர்ப்பித்து மேலதிக சொலிசிட்டர் ஜெனரல் திலீப பீரிஸ், கோட்டை நீதவான் பசன் அமரசேன முன்னிலையில் இன்று இதனை குறிப்பிட்டார். சுரேஷ் சலேவின் உடல்நிலை குறித்து நீதிமன்றத்திற்கு அறிக்கை சமர்ப்பிக்காமை மற்றும் ஐவரடங்கிய மருத்துவ அதிகாரிகள் குழுவிற்கு அறிக்கைகளை வழங்காமை தொடர்பில் செப்டம்பர் 22ஆம் திகதி நீதிமன்றில் முன்னிலையாகி விடயங்களை தெளிவுபடுத்துமாறு தேசிய வைத்தியசாலை பணிப்பாளருக்கு கடந்த வழக்கு தவணையின் போது அறிவித்தல் விடுக்கப்பட்டிருந்தது. அதற்கமைய வைத்தியசாலை பணிப்பளர், டொக்டர் சம்பத் இந்திக குமார, நீதிமன்றத்தில் ஆஜராகியிருந்ததுடன் அவர் சார்பில் மேலதிக சொலிசிட்டர் ஜெனரல் திலீப பீரிஸ் நீதிமன்றத்தில் விடயங்களை முன்வைத்தார். நீதிமன்ற உத்தரவு பிறப்பிக்கப்பட்டுள்ள நிலையிலும் சுரேஷ் சலே தனது கையடக்கத் தொலைபேசி மற்றும் கணினியின் கடவுச்சொற்களை விசாரணை அதிகாரிகளுக்கு இன்னும் வழங்கவில்லை என மேலதிக சொலிசிட்டர் ஜெனரல் திலீப பீரிஸ் தெரிவித்தார். அவர் தற்போது இருதய நோய் தொடர்பான நோயாளர் விடுதியில் உள்ளாரா என நீதவான் வினவியதுடன், இருதயம் தொடர்பான சிகிச்சைகள் முடிந்துவிட்டதாக திலீப பீரிஸ் தெரிவித்தார். ஏனைய நோயாளிகளுக்கும் பல்வலிக்கு இதுபோன்று வைத்தியசாலையில் அனுமதிக்கப்பட்டு சிகிச்சை வழங்கப்படுகிறதா என நீதவான் வினவினார். மருத்துவ அறிக்கையில், சுரேஷ் சலே சித்திரவதைக்கு உள்ளாகியுள்ளார் என குறிப்பிடப்பட்டுள்ளதாக சுரேஷ் சலே சார்பில் ஆஜரான ஜனாதிபதி சட்டத்தரணி ஷவீந்திர பெர்னாண்டோ தெரிவித்தார். அந்த மருத்துவ அறிக்கையில் அவர் மன அழுத்தத்திற்கு உள்ளாகியுள்ளதாக குறிப்பிடப்பட்டுள்ளதுடன், சித்திரவதைக்கு உள்ளானதாக எங்கும் குறிப்பிடப்படவில்லை என நீதவான் இதன்போது தெரிவித்தார். அது தொடர்பாக வேறு நடவடிக்கைகளை எடுக்குமாறு நீதவான் இதன்போது தெரிவித்தார். சம்பவத்துடன் தொடர்புடைய விசாரணைகளின் முன்னேற்றத்தை நீதிமன்றத்திற்கு சமர்ப்பிக்குமாறு உத்தரவிடப்பட்டதுடன், வழக்கு மீண்டும் விசாரணைக்கு எடுத்துக்கொள்ளப்படவுள்ளது.
